Alles for die Katz

(Gedicht vun Annliese Zagolla)

Ich well se eich net vorenthalte

die Gschicht vun meim Balkon gestalte,

weil so a Haufe Netz zu spanne

des is net enfach zu belange.

Dir wisst jo, dass mer Zuwachs han

so kleen, sooo sieß sagt jedermann,

doch keener wees wie scheen des is

wann du im Fuss hast ihr Gebiss.

De Teifl, der is kleen un schwarz

es is a ganz besondre Katz,

ich glaub die Molly is verwandt

mit Dracula aus´m Walacheland.

Ich komm jetz wedder zu der Gschicht

vum Balkon, weil der is jetz dicht,

die Molly sprengt so hoch in´d Heh

mer meint sie hat de Arsch voll Fleh.

Ja, wie ich do so wergle tu

de Nochber schaut mer immer zu,

na frogt er doch was ich do mach

ich antwort ihm: „is alles for die Katz“.

Der hat gemeint, ich will ne neppe

un hal ne grad so for a Deppe,

doch Molly grad in dem Moment

hat lustig sich ins Netz ringhängt.

Jo, unser Molly is a Fratz

un mir tun allles for die Katz,

de Balkon is jetz grad wie Fort Knox

die Katz de Kenich, ich de Ochs.