De Ballweerer

(Gedicht vun Anneliese Zagolla)

Mei Vatter hat mich oft mit g´hol,

wann es soweit wor wedder mol,

zum Ballweerer sin mer gang,

wann die Wuch hat grad angfang.

Ich siehn es heit noch vor mir stehn,

des Werkzeich for de Mann ballweern,

Alaun un Pinsel sin do gstan,

a Seefschal aus Porzellan.

Als Kind han ich do gere zug´schaut,

´s geht mer heit noch unner´t Haut,

wo er mei Vatter hat ballweert,

un ihm die Naas hat umgedreht.

Ballweerer!! han ich zu ihm gsagt,

als er de Lederrieme packt,

tu dei Messer net scharf wetze,

sunst tust mei Vatter noch verletze.

Un weil ich han so laut gewinselt,

hat er a glei mei Gsicht verpinslt,

dann abgewischt de viele Schaum,

mei Backe ingerieb mit Alaun.

Mei Sorche wore grad umsunst,

de Ballweerer hat verstan sei Kunst,

es wor a Freed ihm zu zuschaue,

a Augeschmaus wor´s for die Aue.

Rasiert werd heit nor noch elektrisch,

weil unser Zeit is jo so hecktisch,

Ballweerer gefts heit keene mehr,

ist Nostalgie, is lang schon her...