moli & Molly

Mei Mann is iwerall bekannt

wird moli vun de Freind genannt,

un wie des grad so is im Lewe

ich han de Name Schatz ihm gewe

Ihr frogt eich jetz was soll des sin

vielleicht meint ihr a dass ich spinn

doch bittscheen habt amol Geduld

Dir wird schon sehn, ich sinn net schuld.

Wie der jo wisst seit 18 Tag

mer Zuwachs han, a kleene Plag,

a Katz so sieß wie schwarz se is

hat wie a Löwe a Gebiss.

Weil es jo a Weibche a noch ist

die Namensfindung wor schnell gwiss,

ja Molly han mer se genennt

se doch im Haus noch nimmand kennt.

Ihr fragt Euch sicher jetz schon wieder

die schreibt das selbe Zeig do nieder,

was meint se bloss, wo is de Witz

na ward´s mol ab, eich trefft glei de Blitz



Jo gestern geh ich  aus´m Haus

de Nochber a, er muss a raus,

der schaut mich an, so ganz betroff

ich han gemeint der Kerl is psoff.

Dann frogt er mich, wie´s mir so geht

un wie es mit dem moli steht

ich sag auch noch, is alles klar

des Lewe is so wunderbar.

Es wär jo gar nit sonderbar

wann des net heit schon wedder war,

de Nochber mir so frech heit sagt

de moli ist mit mir geplagt.

Was soll ich sage liewe Freind

ich sin do gstan un han gemeint,

was er for Schmorre do so red

er soll mer sage um was es geht.

Na ja, sagt er dann ganz verlege

die Nochberschaft is jo a Sege,

weil mer kommt in den Genuss

vun de Nochbre ehrem Orgasmus!



Ja er sagt er wor glei gschockt

weil mir jo am Balkon gebockt

und ich mich so han gehe lasse

er stand nur da, und konnt´s net fasse.

Ich laut geruf han, moli kratz mich net

un a net beisse, liewer leck,

un moli hin un moli her

er hat es satt er kann nit mehr.

Jetz is mer jo des Licht unfgange

und desto mehr war ich befange,

der arme Mann der hat net gwisst

das Molly unser Kätzche ist.

Des is bei uns jo wirklich grass

mir han jede owed ufm Balkon unser Spass

un die Moral vun dere Gschicht

Missbrauch deim Mann sei Name nicht.  

Gedicht vun Anneliese Zagolla